No than kap le CNA/F KONG

BY ZATHAWNG LIAN
Hakha le Falam tiin No Than Kap le CNA/F an rak buaibainak ruangah i remlonak ding a ruang a um lo, nain a buaipi huam mi cu nan mah nawl ta…

Ka hawipa Abel nih “ Ka U Aung nupi ttihumnak puai (May 15,2010) ah rak i tel kho ve law cu ka duh ngai” tiin a ka sawm i May 14,2010 zanlei sang ah ka umnak Michigan State in U Khar ( Pu Tial Khar Lian) le a innchungkhar tiin Ko Aung nupi ttihumnak tuah nakding hmun Indianapolis lei ah kan i thawk. Nazi pali len mawtawka mawngh a si i lam tluan ah bia a phunphun kan i ruah. Mah kan i ruah mi lakah tlawmpal langhter ka duhmi tete a um. Ziah ti ahcun kan miphun hawi hna nih theih hna seh timi siaherhnak ka neih caah a si.

Pu Khar nih CNA/ F le No Than Kap karlak ah buaibainak a rak chuakmi kong ah a chim mi bia nih ka lung a ka suk hrinhrang. A hmang ngai ti zong in ka ruah. A chim mi bia cu hi tiin a si,“Tio tiva kam siloah India ramri buaibainak kha Hakha le Falam um Chin miphun vialte minput in tu ni tiang buaipi a kan timh mi chungah buai hi a phu lem lo. Buai awk le i elding zong a um lo. Ziah ti ahcun CNA/F hi Chin mipi nih me pek in thimmi an si lo, an mah lungtho tein ram le miphun dothlennak caah tiin hriamnam a tlaihmi bu a si, cubantukin No Than Kap zong hi Chin miphun nih me pek in rak thim mi a rak si lo bantukin Falam um Chin miphun nih CNA/F tuahding in me an rak pek mi zong a si lo. Cucaah Falam um Chin miphun kha represent a tuah kho lo. A mah lungtho tein ram le miphun caah CNA/F a luhmi a rak si. MP kan rak thim mi hna rak si hna seh law represent an kan tuah ti khawh a si hnga”

Nai hrawng group mail tete i biaruahnak ah Hakha le Falam kan iremlonak a ruang cu No Than Kap le CNA/F buaibainak a rak chuak hnu ah iremlonak a um ti lei kam deuh in catialmi tete a um pah. An catialmi tete ka sia a rem lo ngai. A ruang cu kan nih chungkhar hi Falam ah 1996 in tu ni tiang khua a sakmi kan si. Tu ni tiangah Falam nih Hakha a remlonak zong ka hmu lo bantukin Hakha zong nih Falam a remlonak ka hmu lo. Ka hmu mi le ka theihmi tu cu a luanciami kum 18 hrawng ah India ram chungah buaibainak a rak tonmi No Than Kap ttanhtu minung chim awktlak lo minung zat nih Hakha lei cu… cu ee… kha ee… tiin an ti pah ka hmuh/ ka thei tawn. Cu bantukin CNA/F lei zong nih No Than Kap nih a rak tuahserhnak a tha lomi tete pawl kong ca a chuak. No Than Kap a tanhtu pawl cheukhat nih CNA/F nih No Than Kap a rak tuahserhnak kong a chuak mi cungah biatak tein defend an tuah ve. Careltu mipi cheukhat cu ho dah a hmang tiin khuaruah tam a fawi te. Nain kan theih awk a herhmi cu kan ram a thlen tikah No Than Kap nih a rak tuahserhnak kong ah CNA/F nih taza a cuai te lai dah, cubantukin No Than Kap zong nih taza cuainak a tuah khawh ve te men. Biaceihtu nih bia cu khiah te ko seh! Nangmah le keimah nih CNA/F le No Than Kap rak buaibainak cung biakhiahnak nawl kan ngei lo. Kan ram a thlen tikah biatak le bia hmang a lang te ko lai.
Falam ee, Hakha ee … tiin a au lengmang mi pawl khi Falam le Hakha um Chin miphun kharlak ah i dawtnak le iremnak a um khi an thei lo. Cu siloah an thei ko nain buainak tuah huam an si caah si dawh an lo.A ngaingai ti ahcun Falam le Hakha um Chin miphung cu zeitik hmanh ah kan iremlonak a um lo, nain chim awktlak lo pakhat pahnih tu cu pumpak remlonak ruangah Hakha le Falam mi hmang in buaibainak tuah a hman mi an um.Mah hna nih hi Hakha le Falam um Chin miphung karlak ah cu ee … kha ee.. cu cu an si ee… tbk in iremlonak ding ah ca an tialmi le chim mi pawl chung ah ka Chin miphun hawi mipi nih an theih ning an i palh sual lai ti ka duh lo tuk caah siaherhnak he mah ca hi ka rak tial. Ka lawm.